kirdar mera kitne hawalo pe khara hai, ik lamha hai lekin, urdu poetry

کردار مرا کتنے حوالوں پہ کھڑا ہے

اِک لمحہ ہے لیکن کئی سالوں پہ کھڑاہے

تب تاج محل دولتِ شاہی پہ کھڑا تھا

اب تاج محل چاہنے والوں پہ کھڑا ہے

ہر نقطہ ابھی ہے ترے رخسار کا زیور

ہر لمحہ ابھی زہرہ جمالوں پہ کھڑا ہے

ہم تیرے بھروسے پہ نہ ٹھہرے تھے کہیں بھی

پَر تیرا عقیدہ تو مثالوں پہ کھڑا ہے

بوسیدہ ہے کتنی مرے ایماں کی عمارت

شہتیر ِ یقیں مکڑی کے جالوں پہ کھڑا ہے

ٹوٹا ہے کہاں میرے مقدر کا ستارہ

تِل بن کے ابھی تک ترے گالوں پہ کھڑا ہے

اب کوئی مری شب کا نگہبان نہیں ہے

احساس تحفظ مرا تالوں پہ کھڑا ہے

جب اِنکا جواب ایک بھی معلوم نہیں ہے

پھر علم ترا صرف سوالوں پہ کھڑا ہے