wo chand nagar ki shehzadi, khushbu ki batein karti hai, urdu poetry

وہ چاند نگر کی شہزادی​

خوشبو کی باتیں کرتی تھی ​

رنگوں کو پہنا کرتی تھی ​

خوابوں سے کھیلا کرتی تھی ​

پھولوں میں مہکا کرتی تھی ​

اک رات ، جو راتوں جیسی تھی ​

چاہت کی باتوں جیسی تھی ​

اس رات خیالوں کی چادر ​

میں تنہا اوڑھے بیٹھا تھا ​

کچھ زخم پرانی یادوں کے ​

میں چاند سے جوڑے بیٹھا تھا ​

تب دل نے تھوڑی سی ضد کی ​

چل چاند نگر پر چلتے ہیں ​

میں دل کی بات یہ رکھنے کو​

جب چاند نگر پر پہنچا​

اک دنیا تھی آباد وہاں ​

کچھ آنسو نوحے سپنے تھے ​

کچھ یار پرانے اپنے تھے ​

کچھ آہیں تھیں دیوانوں کی ​

خواہش کا جال بھی پھیلا تھا ​

کچھ باتیں تھی فرزانوں کی ​

جو میں نے ہجر میں کھوئی تھیں ​

وہ نیندیں تنہا بیٹھی تھیں ​

لکھے تھے جو بھی چاہت میں​

وہ باب آوارہ پھرتےے تھے ​

کچھ خواب آوارہ پھرتے تھے ​

جانے میں کب، کس عالم میں ​

خوابوں کے پیچھے بھاگا تو ​

وہ چاند نگر کی شہزادی ​

اس چاند نگر پر اتری ​

پھر۔۔۔۔۔۔۔۔۔۔​

جانے کتنا وقت لگا ​

اور جانے کیا کچھ بیت گیا​

بس اتنا یاد ہے مجھ کو ​

جب ساری دنیا سوتی ہے ​

میں چاند نگر پر جاتا ہوں ​

وہ چاند نگر پر ہوتی ہے ​

وہ چاند نگر کی شہزادی​